تحارير برائے زمرہ: 'ٹپس/ ٹرکس' ...

آپ اپنی پہلی سائٹ بنانے کے قابل ہیں یا پھر آپ کو اپنا ذاتی بلاگ سیٹ اپ کرنا آگیا ہے۔۔۔۔مبارک ہو۔ لیکن اب اصل مسئلہ یہ ہے کہ انٹرنیٹ کی وسیع و عریض دنیا میں اسے کیسے متعارف کروایا جائے؟ اس کیلیے آپ کو ایک عددویب میزبان(Web Host) کی ضرورت ہوگی(نئے بندے کیلیے گھریلو ویب ہوسٹ سیٹ اپ کرنا بہت اوکھا کام ہے)۔ اب سوال یہ آتا ہے کہ انٹرنیٹ پر موجود ہزاروں ویب ہوسٹ میں سے اچھے اور مناسب داموں کی حامل ویب ہوسٹنگ کمپنی کا انتخاب کیسے کیا جائے؟

(نوٹ: میں یہ تحریر اس بات کو مدنظر رکھ کر لکھ رہا ہوں کہ آپ کے پاس آن لائن ادائیگی کیلیے کوئی ذریعہ موجود ہے۔ نہ ہونے کی صورت میں آپکو لوکل ویب ہوسٹس سے گزارہ چلانا ہوگا)۔
اس کیلیے میری کچھ ذاتی تجاویز:
1۔سب سے پہلے تو اپنے بجٹ کا تخمینہ لگائیں، اسی کے مطابق آپ نے اپنے لئے ہوسٹنگ پلان منتخب کرنا ہوگا۔
2۔ بجٹ کے بعد، انٹرنیٹ پر مشہور اور سروسز کے لحاظ سے نیک نام ویب ہوسٹ کی تلاش شروع کیجیے، اسکے لئے سب سے بہترین جگہیں فورمز ہیں۔ ہر قسم کی ویب ہوسٹنگ کے متعلق بات چیت کیلیے سب سے بہترین فورم ویب ہوسٹنگ ٹاک ہے۔ڈیجیٹل پوائنٹ اور سائٹ پوائنٹ پر بھی ہوسٹنگ سے متعلقہ مواد موجود ہوتا ہے اور بسا اوقات اچھی اور سستی ڈیلز مل جاتی ہیں۔
3۔ جہانتک ہوسٹنگ فیچرز کی بات ہے وہ تھوڑے بہت فرق کیساتھ اکثر ہوسٹس میں ایک جیسی ہوتی ہیں۔ اگر آپ نے کسی خاص ویب پروگرامنگ لینگویج(مثلاً پی ایچ پی) کا انتخاب کیا ہے تو اسی کی مناسبت سے ہوسٹنگ پلان منتخب کریں۔
4۔ یاد رکھیں مشہور سائٹس کی وجہ شہرت صرف مناسب قیمت نہیں ہوتی بلکہ کسٹمر سپورٹ اسے دوسروں سے ممتاز بناتی ہے۔ ہو سکتا ہے کسی ویب ہوسٹ سے آپکو نسبتاً سستی قیمت میں ہوسٹنگ پلان مل جائے لیکن دوران استعمال کسی خرابی کی صورت میں اگر وہ آپکی درخواست کا جواب گھنٹوں کی بجائے دنوں یا ہفتوں میں دے یا مسئلہ حل کرنے سے قاصر رہے، تو ایسے ویب ہوسٹ صرف پیسے کا زیاں ہیں۔
5۔ اکثر مشہور ویب ہوسٹ ایسے پروموشن کوڈ(یا کوپن) دیتے ہیں جو خریدتے وقت اگر آپ فارم پُر کرتے وقت داخل کریں تو آپکو اچھی خاصی رعایت مل جاتی ہے۔ اگر آپ کو منتخب شدہ ہوسٹ کے فارم میں ایسی کوئی جگہ نظر آئے تو فوراً تلاش کرکے پروموشن کوڈ ڈالیں۔ عین ممکن ہے آپ پروموشن کوڈ کی بدولت رعایت کے مستحق ٹھہریں(جیسے میں نے کل ڈریم ہوسٹ پر 120 میں سے 50 ڈالرز بچا لئے تھے)۔ جیسے گوڈیڈی کے پروموشنل کوپن آپ یہاں، سائٹ5 کے یہاں اور ڈریم ہوسٹ کے یہاں حاصل کر سکتے ہیں۔ صرف گوگل میں مطلوبہ کمپنی کانام اور آگے کوپن(Coupon) یا پرومو کوڈ(Promo Code) لکھ دیں، ہزاروں سائٹس آپکو مل جائینگی۔
بقول غالب: مفت ہاتھ آئے تو بُرا کیا ہے
اگلی نشت میں ڈومین نیم کی خریداری کے متعلق بات ہوگی۔

آپ نے میرے بلاگ پر آراء کے خانے میں کچھ نئی چیزیں دیکھی ہونگی۔ مثلاً ہر خانے میں فیلڈ کی مناسبت سے آئیکن۔ اپنے بلاگ یا کسی بھی دوسری قسم کی سائٹ میں فارم خوبصورت بنانا نہایت آسان ہے۔ ضروری نہیں کہ صرف آئیکن لگا کر فارم کو خوبصورت بنایا جائے۔ متناسب چوڑائی لمبائی، رنگوں، ماؤس اوور کے ایفیکٹ وغیرہ سے بھی فارمز کو پُرکشش بنایا جاسکتاہے۔ سرِدست میں آپکو فارم کے خانوں میں آئیکن (دراصل پس منظر تصاویر Background Images) لگانے کا طریقہ بتاتا ہوں۔

اس عمل کو سرانجام دینے کیلیے ہمیں ایچ ٹی ایم ایل(یا ایکس ایچ ٹی ایم ایل) اور سی ایس ایس سے تھوڑی بہت چھیڑخانی کرنی ہوگی۔ سب سے پہلے تو آپ یہاں سے مفت میں ویب آئیکنز ڈاؤن لوڈ کرلیں۔ اب اپنی مطلوبہ ایچ ٹی ایم ایل فائل کھولیں۔(ورڈپریس کی صورت میں اپنی تھیم کی  پی ایچ پی فائلComments.php فائل کھولیں۔)۔ کوشش کریں کہpng کی بجائے gif استعمال کریں، کیونکہ شفاف png کو ہینڈل کرنے میں انٹرنیٹ ایکسپلورر7 سے نیچے کے تمام ورژن ماٹھے واقع ہوئے ہیں۔

یہاں آراء کے فارم پر آئیں۔ یہاں ہم یہ دیکھیں گے کہ نام، ای میل، ویب کا پتہ اور رائے کے خانے پر پہلے سے کوئی سی ایس ایس کی کلاس یا Div تو اپلائی نہیں کیا گیا۔اگر پہلے سے کوئی اپلائیڈ ہو تو ہمیں صرف اسمیں سی ایس ایس میں جا کر تبدیلیاں کرنی ہونگی، دوسری صورت میں ہمیں خود یہ کلاسز بنانی ہونگی۔ سادہ صورت میں(بغیر کسی کلاس، جاواسکرپٹ اور دوسری الابَلا کے) ان خانوں کو کوڈ کچھ اس طرح ہوگا: (نام کے خانے کا کوڈ)

<input type="text" name="author"  id="author" value="<?php echo $comment_author; ?>" tabindex="1" />

یہاں ہم نے اطمینان کر لیا کہ کوئی کلاس اس خانے پر اپلائی نہیں ہو رہی۔ سو ہم سی ایس ایس میں جا کر نام کے خانے کا سٹائل کنٹرول کرنے کیلیے کوڈ لکھیں گے۔ یہاں آپ اس خانے کی ID ضرور نوٹ کرلیں۔
سی ایس ایس میں آکر ہم نام کے خانے کیلیے کچھ اسطرح کوڈ لکھیں گے:
input#author { }

لیجیے اب ہم نام کے خانے کی سٹائلنگ کیلیے تیار ہیں۔یہاں یہ خیال رکھیں کہ اگر آپ نے صرف input لکھ کر سٹائلنگ شروع کی تو تمام صفحہ پر جہاں جہاں input کے خانے ہیں مثلاً تلاش کا خانہ، Submit کا بٹن، ای میل، ویب پیج کے خانے سب پر ایک ہی قسم کی فارمیٹنگ اپلائی ہو جائیگی۔ اسی لئے ہم نے input کے ساتھ ساتھ خانے کی آئی ڈی یعنی author بھی دی، تاکہ صرف ہمارے مطلوبہ خانےکی فارمیٹنگ ہو۔
اب آتے ہیں اس خانے میں آئیکن لگانے کیطرف۔ کوڈ کچھ اسطرح ہوگا:

input#author { background: url('images/user.gif') no-repeat
center right; padding-right: 20px; }

ہوتا یہ ہے کہ Background کی پراپرٹی میں ہم مطلوبہ آئیکن(یعنی تصویر) اور اسکی پوزیشن بتاتے ہیں۔ جبکہ Padding کے ذریعہ ہم خانے میں لکھے جانے والے ٹیکسٹ سے آئیکن کو فاصلہ دیتے ہیں تاکہ وہ اسکے اوپر نہ آئے۔ چونکہ میری تھیم اردو میں ہے اسلئے میں نے بیک گراؤنڈ تصویر کی پوزیشن Right رکھی اور پیڈنگ بھی تصویر کے دائیں رکھی ہے۔ Background کے بارے میں مزید آپ یہاں اور Padding کے بارے میں یہاں جان سکتے ہیں۔ ہمارے اس کام کا نتیجہ کچھ یوں ہوگا:

گو میں نے یہ ٹیوٹوریل زیادہ تفصیل سے نہیں لکھا لیکن سی ایس ایس کی تھوڑی شدبد رکھنے والے افراد باآسانی اسے استعمال کر سکتے ہیں۔ اگر آپ بالکل نئے ہیں سی ایس ایس کی دنیا میں، تو یہ سائٹ آپ کے لئے مفید رہیگی۔ سائٹ یہ بھی بُری نہیں۔

پچھلے دنوں میں نے اپنا فائرفاکس پرانے ورژن2.0.0.7 سے 2.0.0.8پر اپ گریڈ کیا جس کے بعد تمام ایڈ آنز(Add Ons) نے کام چھوڑ دیا۔ تلاش بسیار کے بعد مجھے اسکا ایک آسان حل ملا۔ اگر آپ کیساتھ بھی ایسا مسئلہ درپیش ہے تو یہ حل آزمائیے اُمید ہے افاقہ ہوگا۔ حل کچھ یوں ہے:

• فائرفاکس بند کریں۔
• فائرفاکس یوزر پروفائل میں جائیں، جسکا آسان طریقہ یہ ہے کہ Run میں %APPDATA% لکھ کر ونڈوز صارف کے Application Data میں جائیں۔
• فائرفاکس کے فولڈر میں پروفائلز کے فولڈر میں جائیں۔ پاتھ کچھ یوں ہوگا:

Application Data/Mozilla/Firefox/Profiles

• اپنے پروفائل کے فولڈر میں داخل ہو کر extensions.cache ، extensions.ini اور extensions.rdf نامی فائلیں ڈیلیٹ کر دیں۔

اب فائرفاکس سٹارٹ کر کے چیک کریں، اُمید ہے ایڈآنز چل پڑے ہونگے۔

کیا آپ اپنی آئی ایس پی کے ڈی این ایس سرور کی سست رفتاری یا پھر چلتے چلتے جواب دے جانے کے مسئلے سے تنگ ہیں؟ یا آپ اپنے سکول یا گھر کے نیٹ ورک سے نہیں چاہتے کہ بچے نامناسب اور غیر محفوظ سائٹس تک رسائی حاصل کر سکیں؟ ان سب کا جواب ہے اوپن ڈی این ایس (Open DNS)۔۔۔جو آپکے آئی ایس پی کے مہیاکردہ ڈی این ایس ایڈریس اس سے  بدلنے پر آپکو ان تمام مسائل سے چھٹکارا دلاتا ہے۔نہ صرف یہ بلکہ اوپن ڈی این ایس کی مدد سے آپ اپنے نیٹ ورک پر آنے جانے والی انٹرنیٹ ٹریفک بھی مانیٹر کر سکتے ہیں اور مزے کی بات یہ سروس بالکل مفت ہے۔اوپن ڈی این ایس کی بدولت سپیلنگ کی غلطیوں کے باجود آپ مطلوبہ ویب سائٹ پر جا سکتے ہیں۔ اگر آپ نے غلطی سے com کی جگہ cm لکھ دیا تواوپن  ڈی این ایس خود بخود پتہ درست کر کے آپکو مطلوبہ سائٹ تک پہنچا دے گی۔ اور ہاں اوپن ڈی این ایس آپ ڈائنامک آئی پی کیساتھ بھی استعمال کر سکتے ہیں۔ اوپن ڈی این ایس استعمال کرنے کیلیےاپنا ڈی این ایس سرور ایڈریس مندرجہ ذیل سے بدل دیجیے:

208.67.222.222
208.67.220.220

ڈی این ایس کیسے تبدیل کریں (برائے ونڈوز ایکس پی)

1. سٹارٹ مینو سے کنٹرول پینل(Control Panel) میں جائیں۔

جاري رکھيے »

نئے بلاگرز کیلیے اپنے بلاگ پر نئی تھیم نصب کرنا یا کسی نئے پلگ ان کا اضافہ کرنا جوئے شیر لانے کے مترادف ہے۔ چند ایک جو بڑے جوش و خروش سے بلاگنگ کیطرف آتے ہیں، یہ سردرد دیکھ کر بلاگنگ سے ہی کنارہ کش ہو جاتے ہیں۔ ۔۔۔۔چند ایک کیلیے اس قسم کی ٹیکنیکل چیزیں ایک فضول کام ہوتا ہے، لیکن ‘مجبوری کا نام شکریہ’ کے مصداق کبھی کبھار ایسے لوگوں کو کسی نئی تھیم یا پلگ ان کی ضرورت پڑ جاتی ہے اور پھر مجبوراً دوسرے صاحبان کی مدد حاصل کرنی پڑتی ہے۔ اسکے ساتھ ساتھ یہ بھی حقیقت ہے کہ تھیمز اور پلگ ان کی انسٹالیشن جاننے والے افراد بھی اس قدرے لمبے پراسس سے اُکتا جاتے ہیں۔
جو بھی ہے ان سب کا حل کوئی ایسا پروگرام یا پلگ ان ہے جو واقعتاً ایک کلک سے آپ کیلیے تھیم یا پلگ ان انسٹال کر دے۔ اس خواب کو حقیقت دی ہے ہندوستان کے انی رُدھ سنجیو نے۔ انہوں نے کچھ عرصہ قبل One Click کے نام سے ایک پراجیکٹ شروع کیا، جس کا مقصد ورڈپریس بلاگز کیلیے تھیمز اور پلگ انز کی انسٹالیشن بذریعہ ایک پلگ ان(جو ایک فائرفاکس ایکسٹیشن کیساتھ بھی کام کرتا ہے) آسان بنانا ہے۔

اسوقت اس پلگ ان کا ورژن 0.9.8 چل رہا ہے۔ اس پلگ ان کی بدولت آپ بغیر کسی ایف ٹی پی کلائنٹ کے صرف ایک کلک سے تھیمز اور پلگ ان کی انسٹالیشن کہیں سے بھی کر سکتے ہیں۔ اس پلگ ان کے مزید قصیدے آپ موصوف کے بلاگ پر یا گوگل پر تلاش کے زریعے دیکھ سکتے ہیں۔ سردست ہم اس پلگ ان کا استعمال آپکو سکھاتے ہیں۔ جاري رکھيے »

سمائلیز(Smilies) انٹرنیٹ پر لکھی جانی والی تحاریر کا ایک اہم جزو بن چکی ہیں۔ چاہے یہ تحاریر کسی بلاگ پر لکھی جائیں۔۔۔۔یا انہی تحاریر پر لکھی جانی والی آراء ہوں یا پھر کسی چوپال(Forum) پر لکھی جانی والی تحریریں۔ سمائلیز کے زریعے ہم محض ایک چھوٹی سی آئیکن نما تصویر کے زریعے اپنے جذبات کو تحریر کر سکتے ہیں، جسکے اظہار کیلیے دوسری صورت میں ہمیں پوری لائن یا لائنیں لکھنی پڑیں۔

چوپالوں پرسمائلیز، تحریر لکھتے ہوئے اوپر نیچے یا دائیں بائیں کہیں موجود ہوتے ہیں، جو صرف کلک کرنے پر تحریر میں شامل ہوجاتے ہیں۔ بلاگ پر یہ سمائلیز موجود تو ہوتے ہیں لیکن انہیں تحریر یا آراء برائے تحریر میں ڈالنے کیلے شارٹ کٹ ٹیکسٹ کا سہارا درکار ہوتا ہے۔ دائیں سے بائیں لکھی جانی والی تحریروں میں ان شارٹ کٹس کو استعمال کرنا پورا عذاب ہوتا ہے اور تمام سمائلیز کے شارٹ کٹس یاد رکھنا بھی ہر فرد کیلیے ممکن نہیں۔

اردو تحریر میں سمائلیز کی مشکلات

اسی مشکل کو آسان بنانے کیلیے ورڈپریس بلاگ کیلیے ایک مفید پلگ ان wp-grins نامی پلگ ان بنایا گیا ہے۔ اس بلگ ان کی بدولت نہ صرف آپ اپنی تحریروں میں سمائلیز آسانی سے ڈال سکتے ہیں بلکہ آپکی تحاریر پر آراء دینے والے صارفین بھی صرف ایک کلک سے آراء میں سمائلیز آسانی سے ڈال سکتے ہیں۔ ذیل کی تصاویر ملاحظہ فرمائیں۔

بلاگ ایڈیٹر میں سمائلیز

آراء کے خانے کیلیے سمائلیز

یہ پلگ ان آپ اس ربط سے ڈاؤن لوڈ کر سکتے ہیں۔

پلگ ان انسٹالیشن کا طریقہ:

• پلگ ان کی zip فائل کو unzip کیجیے۔
• اپنے ایف ٹی پی پروگرام کے ذریعے wp-grins نامی فائل کو wp-content/plugins نامی فولڈر میں اپلوڈ کر دیں۔
• اپنے ورڈپریس ایڈمین پینل میں جاکر Plugins کے صفحہ سے اس پلگ ان کو فعال (Activate) کرلیں۔

لیجیے اب آپکے بلاگ پر سمائلیز کا استعمال مشکل نہیں رہا۔