اردو ٹیکنالوجی بلاگ

الوداع

ساجد اقبال — Tue, 14 Oct 2008 12:27:31 +0000

آج کئی ماہ بعد اپنے اس گم گشتہ بلاگ پر آنا ہوا لیکن اس بدنصیب بلاگ کی قسمت بدلنے نہیں بلکہ الوداع کہنے۔ جی ہاں یہ اوپر روتے ہوئے پھول اس بات کا اعلان ہیں کہ آج سے ہم اس بلاگ کو ریٹائر کر رہے ہیں اور اس تحریر کے بعد یہاں کوئی تحریر شائع نہیں کی جائیگی۔
تاہم اتنے افسوس والی بات نہیں کہ اسی سے ملتا جلتا بلاگ ہم(میں اور عمار) نے اردو ماسٹر کے نام سے شروع کیا ہے۔ سو اگر آپ کو ہمارا بلاگ پسند تھا تو ہماری تحریریں پڑھنے کیلیے اردو ماسٹر پر تشریف لائیں۔ جن قارئین نے اس بلاگ کو اپنا قیمتی وقت صرف کر کے پڑھا اور آراء دیں میں ان کا تہہ دل سے مشکور ہوں اور امید کرتا ہوں کہ ہمارا ساتھ اردو ماسٹر کے توسط سے قائم رہیگا۔ ان شاء اللہ
“

اردو ماسٹر

ورڈپریس ہیلپ شیٹ

ساجد اقبال — Mon, 07 Apr 2008 07:42:36 +0000

اکثر بلاگرز اپنے بلاگ کے سافٹ وئیر یا خاص کر اپنی تھیم سے چھیڑ چھاڑ کرتے رہتے ہیں۔ سادہ ایچ ٹی ایم ایل تو سمجھ میں آجاتی ہے لیکن پی ایچ پی کے ٹیگز مبتدیوں کے سر کے اوپر سے گزر جاتے ہیں اور بعض اوقات ان پی ایچ پی ٹیگز سے چھیڑ چھاڑ بلاگ سافٹ وئیر یا پھر تھیم کی خرابی پر منتج ہوتی ہے۔WPCANDY ورڈپریس کے متعلق ایک مفید بلاگ ہے۔ اس بلاگ کے مصنف نے ورڈپریس کے متعلق ایک بہت عمدہ ہیلپ شیٹ تیار کی ہے جو آپ یہاں سے ڈاؤن لوڈ کر سکتے ہیں۔

اس ہیلپ شیٹ کی مدد سے آپ ورڈپریس کے ٹمپلیٹ کی ساخت اور ان میں استعمال ہونے والے پی ایچ پی ٹیگز اور انکے فنکشنز کے متعلق بخوبی جان سکتے ہیں۔ اس ہیلپ شیٹ کو پڑھنے کے بعد اُمید ہے آپکو تھیم اردوانے میں بھی آسانی رہیگی۔

آپکے بلاگ کیلیے خوبصورت آر ایس ایس آئیکنز

ساجد اقبال — Sun, 06 Apr 2008 05:46:40 +0000

آر ایس ایس فیڈ ہر بلاگ کا ایک لازمی جزو ہے۔ آر ایس ایس کا نمائندہ آئیکن() کافی عام سا ہے اور اس کا استعمال بھی بہت عام ہے۔ اگر آپ چاہتے ہیں کہ آپ کا آر ایس ایس آئیکن منفرد ہو تو آپ کے لئے خوشخبری ہے کہ آر ایس ایس آئیکنز اب مختلف خوبصورت شکلوں اور رنگوں(نارنجی رنگ کے علاوہ بھی) میں دستیاب ہیں۔ کرنا صرف آپ نے یہ ہے کہ اپنے تھیم کے امیجز(Images) فولڈر میں موجود آر ایس ایس آئیکن کو آپ نے ان آئیکنز سے بدل لینا ہے۔ اور اگر آپ خود فوٹوشاپ کا استعمال جانتے ہو تو اس آسان ٹیوٹوریل کی مدد سے آپ اپنا آر ایس ایس آئیکن خود بنا سکتے ہیں۔

جی میل مارکہ صابن

ساجد اقبال — Sat, 22 Mar 2008 07:07:19 +0000

سپیم ای میلز کی صفائی میں نام بنانے کے بعد اب پیش ہے جسم کی صفائی کیلیے جی میل مارکہ صابن۔ جی ہاں! لیکن یہ صابن گوگل نے نہیں بلکہ روس کی ایک کمپنی نے جی میل کی سپیم صفائی سے متاثر ہو کر بنایا ہے۔ روسی زبان میں تحریر ٹیگ لائن کا انگریز مطلب The Purest Soap یعنی خالص ترین صابن ہے۔ کیا آپ کو اس صابن کی ضرورت ہے؟؟؟؟

میرے پیارے سیارے!

ساجد اقبال — Fri, 14 Mar 2008 11:42:39 +0000

ہاں میں زندہ ہوں اور یہ بھی ایک خوشگوار اتفاق ہے کہ میں ٹھیک ٹھاک ہوں۔
یہ چھوٹی سی تمہید اسلئے کہ شاید کسی نے میری آخری تحریر کی تاریخ دیکھ کر سوچا ہو کہ کافی دنوں سے موصوف غائب ہیں۔ کسی سے مراد اردو ویب سیارہ بھی ہو سکتاہے۔ تو اے میرے پیارے سیارے! عرض ہے کہ ہم اس سارے عرصے کے دوران دو کاموں نے ہمیں الجھائے رکھا، ایک تو غم روزگار۔۔۔جہاں ہمیں نیا پراجیکٹ کچھ ایسا کرنا ہے کہ رومن اردو میں بھیجے گئے ایس ایم ایس کو یونیکوڈ اردو ایس ایم ایس میں تبدیل کر کے بذریعہ اپنے کبوتر(Gateway) منزل تک پہنچانا ہے۔ اب ہم کہاں کے قابل تھے۔۔۔۔۔۔۔۔جو یہ ساری پروگرامنگ کریں، سو ہمارا حصہ اتنا ہی ہے کہ رومن اور یونیکوڈ الفاظ کا ذخیرہ اکٹھا کریں۔ خاصا بور اور تھکا دینے والا کام ہے لیکن لگے ہوئے ہیں۔ کسی کے پاس اس قسم کے کام کا کوئی آئیڈیا یا تجربہ ہو تو ثواب دارین کیلیے تبصرے میں کچھ عرض کردیں۔
دوسرے ہمیں جملہ(Joomla) شریف نے آجکل الجھایا ہوا ہے، کچھ نہ کچھ تو ہم نے زیر کر ہی لیا لیکن ابھی بہت کچھ کرنا باقی ہے۔ ویسے بھی ہمارا دماغ جتنی تیزی سے کام کرتا ہے لگتا ہے ایک سال تو جملہ جملہ کرتے ہی گزر جائیگا۔
دیگر احوال یہ ہے میرے پیارے سیارے! کہ خیر سے ہم نے اپنی عمر بھر کی غیر مستقل مزاجی کو ٹھینگا دکھاتے ہوئے اس بلاگ شریف پر موجودہ تحریر کو ملا ١٠٠تحریریں پوری کرلیں ہیں۔ مبارکباد کی کوئی ضرورت نہیں میرے پیارے سیارے۔ یہی دعا ہے تم ہمیشہ ترقی کرو اور ہماری بونگیوں کیلیے دل میں جگہ(سپیس+ بینڈوڈتھ) قائم رکھو۔ اٰمین

ونڈوز جینوئن ایڈوانٹیج(WGA) کی سردردی سے نجات

ساجد اقبال — Sun, 20 Jan 2008 07:35:06 +0000

آپ پاکستانی ہیں؟ میں 99 فیصد یقین سے کہہ سکتا ہوں کہ اگر آپ اس وقت ونڈوز خدمتگار نظام(Operating System) استعمال کر رہے، تو یہ چوری شدہ نسخہ ہو گا۔اگر آپ ونڈوز اپ ڈیٹس یا دوسرے مائیکروسافٹ کے سافٹ وئیرز ڈاؤن لوڈ کر کے انسٹال کرتے رہتے ہیں تو عین ممکن ہے کہ آپ کا پالا مائیکروسافٹ ونڈوز جینوئن ایڈوانٹیج نامی مصیبت سے پڑ جائے، جسکے انسٹال ہونے کے بعد اس قسم کے پیغامات آپکو تنگ کرنے لگیں گے:

اس کا پہلا حل تو یہ ہے کہ آپ ونڈوز استعمال کریں ہی نہ، لینکس استعمال کریں۔ پھر بھی آپ بضد ہیں تو حل بتائے دیتا ہوں:

1۔ Run میں جا کر System32 لکھیں۔ آپکے سامنے System32 فولڈر کُھل جائیگا۔

2۔ WgaLogon.dll نامی فائل پر آئیں۔

3۔ اوپر فولڈر ونڈوز میں Tools > Options پر جائیں اور View ٹیب میں Hide extensions for know file types سے چیک ہٹا کر اوکے کردیں۔

4۔ اب WgaLogon.dll کے نام کو WgaLogon.dll.bak سے بدل دیں۔

5۔ فولڈر میں کہیں رائٹ کلک کر کے New میں جائیں اور Tex Document بنا کر اسکا نام WgaLogon.dll رکھ لیں۔ نام یا ایکسٹینشن بدلتے جہاں بھی ونڈوز کوئی پیغام دے اسے اوکے کرتے جائیں۔

6۔اسی فولڈ میں WgaTray.exe نامی ایک پروگرام ہوگا، اسے کلک کرکے منتخب کریں ٹاسک مینجر کھولیں(ctrl+alt+del سے)۔ پراسسز(Processes) میں جاکر WgaTray.exe کو بند کر دیں اور اسی فولڈر میں موجود WgaTray.exe کو جلدی سے ڈیلیٹ کر دیں۔اگر آپ نے وقفہ دیا تو یہ پروگرام پھر سے چل پڑیگا اور فولڈر میں موجود پروگرام فائل حذف نہیں ہوگی۔ اسلئےیہاں سرعت سے حذف کرنا لازمی ہے۔

لیجیے اُمید ہے اب WGA کے پیغامات آپ کے کام میں دخل انداز نہیں ہونگے۔ یاد رکھیے اس طریقے سے آپکی ونڈوز اصل نہیں ہوجاتی۔